ముఖపుస్తకం – 6


రెండు రోజులయ్యింది.

నాకు ముఖపుస్తకం బాగానే వంటబట్టింది. అప్‌డేట్స్ చదవడం లైకులు కొట్టడమే కాకుండా నా పరిధి ఇంకొంత పెంచుకున్నాను. ముఖ్యంగా నాలో సామాజిక స్పృహ పెరిగింది. అంటే ఇప్పటి వరకు సామాజిక స్పృహ తప్పి పోయి పడి ఉన్నాను అని కాదు. స్పృహలో ఉన్నా ఏం చేయలేదు అని అర్థం.

ఈ సంగతి కూడా నాకు అప్పిగాడి వల్లే తెలిసింది. అప్పిగాడు ఈరోజే హాస్పిటల్ నుంచి ఇంటికి వచ్చేశాడు. వాడి యోగక్షేమాలు విచారించుకోవడానికి ఫోన్ చేశాను. వాడు ఫోనెత్తగానే, “ఎలా ఉందిరా?” అని అడిగాను ఆదుర్దాగా.

“ఖంగారు పడాల్సిన పని లేదు, నేను బాగానే ఉన్నాను,” అన్నాను వాడు.

“ఏం జరగకపోవడం ఏంటి, కుక్క కరిచింది అని మీ అన్నయ్య నాతో చెప్తేనూ!”

“అంటే ఆ కుక్కని అలా క్లోజప్‌లో చూసి నేను స్పృహ తప్పిపోయాను. దాని వల్ల అందరూ కరిచింది అనుకున్నారు.”

“మరి కరవనప్పుడు హాస్పిటల్‌లో రెండు రోజులు ఎందుకు ఉన్నావు?”

“ఆ ఎఫెక్ట్ తగ్గడానికి కొంత టైం పట్టిందిలే. మధ్య మధ్యలో లేచి నేను వెర్రి కేకలు వేస్తున్నాను అని డాక్టర్ నన్ను రెండు రోజులు హాస్పటల్లొ ఉంచేశాడు.”

“పోనీ లేరా, త్వరలోనే బయట పడ్డావు. ఆ రూట్లో మళ్ళీ వాకింగ్‌కి వెళ్ళకు. వెళ్ళినా ఒక కర్ర పట్టుకుని వెళ్ళు, ఎందుకైనా మంచిది.”

“ఏడ్చినట్టుంది, కర్ర పట్టుకుని నడిస్తే నాకు ఏజ్ బార్ అయిపోయింది అనుకుంటారు. అసలే ఇంకా పెళ్ళి కాలేదు. అయినా నేను వాకింగ్‌కి ఎప్పుడో కానీ వెళ్ళను లేరా. సో, పర్లేదులే. ఇంతకీ ఈ రెండు రోజులు ఏం చేశావు?”

“బోలెడు మంది అప్‌డేట్స్ చదివాను. ఇప్పుడిప్పుడే నా అప్‌డేట్స్ కూడా పెట్టడం నేర్చుకుంటున్నాను. ఇంతకు ముందే మూడు దోశలు, ఆరు ఇడ్లీలు లాగించాను అని ఫ్రెష్ అప్‌డేట్ పెట్టాను. చూడలేదా?”

“అది సరే. సామాజిక స్పృహ ఏమైనా పెంచుకున్నావా?” అడిగాడు ఆప్పారావు నన్ను.

“నాకు గడ్డమే ఎగుడు దిగుడుగా పెరుగుతుంది. ఈ సామాజిక స్పృహ పెంచుకోవడం ఎలా?”

“ఓరి పిచ్చోడా, సామజిక స్పృహ అంటే, సమాజంలో మన చుట్టూతా జరుగుతున్న విషయాలని గమనించి వాటి పట్ల స్పందించడం.”

“అంటే?”

“ఉదాహరణకు, ఇప్పుడు సిరియాలో సివిల్ వార్ జరుగుతూంది. దాని పట్ల నీ అభిప్రాయం ఒకటి అప్‌డేట్‌గా పెట్టెయ్యి. ఆ రకంగా మిగతా జనంలో కూడా సామాజిక స్పృహ పెంచు.”

“సిరియాలో సివిల్ వార్ జరుగుతూంది అని నాకు తెలీదురా,” కాస్త సిగ్గు పడుతూ అన్నాను నేను.

“మరదే! న్యూస్ చూడు, చదువు. నీ జ్ఞానాన్ని పెంచుకో. దాన్ని అందరితో పంచుకో. అంతే కాకుండా వేరే వాళ్ళు ఇలాంటిదే రాస్తే వెంటనే స్పందించు, లేకపోతే నీకు ఏమీ తెలీదు అనుకుంటారు.”

“ఓహో.”

“రెచ్చిపో,” ఫోన్ పెట్టేశాడు అప్పిగాడు.

ఆ తరువాత నేను నిజంగానే రెచ్చిపోయాను.

ముందుగా నా ముఖపుస్తకం ఫ్రెండ్స్ పెట్టిన సామాజిక అప్‌డేట్స్ మీద ఎడా పెడా స్పందించా. సిరియాలో యుద్ధం అమానుషం అని, అఫ్ఘనిస్తాన్ పరిస్థితి దారుణమని, కాష్మీరుని చూస్తూంటే కడుపు తరుక్కుపోతూందని, అమెరికాలో ఎకానమీ గురించి చాలా ఆందోళనగా ఉందని, చైనాలో మానవ హక్కుల గురించి అంతా గొంతు చించుకోవాలని వివిధ రకాలుగా స్పందించాను.

ఆ తరువాత, సెలెబ్రిటీస్ జీవితాల్లో జరిగే సంఘటనల పట్ల నా అమూల్యమైన అభిప్రాయాలు తెలియపరిచాను.

అభిషేక్‌కి, ఐశ్వర్యకి కూతురు పుట్టడం నాకెంతో ఆనందం కలిగించిందని, నేను ఆ పిల్లకి మామయ్యలా ఫీల్ అవుతున్నానని, అమితాబ్ త్వరగా కోలుకోవాలని,రాం గోపాల్ వర్మ తీస్తానని ప్రామీస్ చేసిన 20 సినిమాల్లో కనీసం ఒక్కటైనా తీయాలని, రాహుల్ గాంధి దేశ ప్రధాని అయితే ఆయనకు మంచిదే కాని, దేశానికి అంత మంచిది కాదేమోనని, ఇండియన్ క్రికెట్ టీం ఇక ఇండియా బయట ఆడితే ఒప్పుకునేది లేదని, కాంగ్రెస్‌లో చేరినందుకు కనీసం చిరంజీవికైనా సామాజిక న్యాయం జరగాలని, అబ్బాస్ హార్పిక్ అడ్వర్టైజ్‌మెంట్‌లో యాక్ట్ చేయడం నాకు నచ్చట్లేదని, చంద్ర బాబుకి రెండు కళ్ళ సిద్ధాంతం వర్కౌట్ కావట్లేదు కాబట్టి, మూడు కళ్ళ సిద్ధాంతాన్ని పాటించాలని, జగన్ మిస్ అయిన బాధితుల కోసం, ఇంకో రౌండ్ ఓదార్పు యాత్ర వేయాలని, కే.సీ.ఆర్ ఈ సారి వీధుల్లో వంట సమ్మె చేసినప్పుడు వీధుల్లో నార్త్ ఇండియన్ వంటకాలు కూడా వండాలని, ఇలా చెలరేగి పోయాను.

ఆ తరువాత నాకనిపించింది; ఇలా వేరే వాళ్ళు రాసిన వాటి మీద స్పందించడమే కాకుండా, ప్రజలని విజ్ఞాన వంతులని చేయడానికి నా వంతు కృషి నేను కూడా చేయాలని.

రక రకాల వెబ్ సైట్స్ వెతికి, కష్టపడి ఒక కొత్త సమాచారం సంపాదించాను. ప్రభుత్వం గిరిజన సంక్షేమ పథకం కింద ఆదివాసులున్న ఒక గూడెంలో వాళ్ళని విద్యావంతులు చేయాలని సంకల్పించింది. ఆ పథకానికి కేటాయించిన నిధుల్లో, ముఖ్య మంత్రి నుండి ఫారెస్ట్ ఆఫీసర్ వరకు అందరు పంచుకున్నాక మిగిలిన డబ్బుతో ఒక ఆదివాసిని మాత్రం చదివించగలిగారు. ఇప్పుడు అతను రెంటికి చెడ్డ రేవడు అయ్యాడు. పదో క్లాస్ ఫెయిల్ కావడం వల్ల, వృత్తి విద్యలేవి రాక పోవడం వల్ల, అతను ఇప్పుడు ఏమీ చేయలేని పరిస్థితిలో ఉన్నాడు.

అతని కథ విశదంగా చెప్పే ఒక లింక్‌ని, “ఎంత అమానుషం!” అనే హెడ్డింగ్ కింద పెట్టి, నా కొత్త అప్‌డేట్‌ని ముఖ పుస్తకం ప్రజల మీదకి వదిలాను.

అరగంటలో యాభై రెస్పాన్సులు వచ్చాయి. వల్లకాట్లో రామనాధమైతే, “ఇంత ఉత్తమమైన సమాచారం అందించినందుకు ధన్య వాదాలు. కట్టెల అవసరం ఏమైనా ఉంటే అడగడానికి మొహమాట పడొద్దు,” అని మరీ రాశాడు.

ఫోన్ మోగింది. అప్పారావు.

ఫోనెత్తగానే, “కంగ్రాట్స్‌రా! నీ అప్‌డేట్స్ అన్నీ చూస్తూనే ఉన్నాను. నీలో సామాజిక స్పృహ జ్వరం పెరిగినట్టు పెరిగిపోయింది,” అన్నాడు మెచ్చుకోలుగా.

“థాంక్స్‌రా!” ఉబ్బి తబ్బిబ్బయ్యాను నేను.

“ఇప్పుడు నువ్వు అర్జెంట్‌గా చేయాల్సింది, నీ గురించి నువ్వు తెలుసుకోవడం. అంటే ముఖ పుస్తకంలో రక రకాల క్విజ్జులు వుంటాయి. వాటిని యాన్సర్ చేస్తే, నీ పర్సనాలిటీ గురించి నీకు అర్థమవుతుంది,” కర్తవ్యం బోధించాడు, అప్పిగాడు.

(ఇంకా ఉంది)

Advertisements
This entry was posted in ముఖపుస్తకం, సీరియల్స్. Bookmark the permalink.

8 Responses to ముఖపుస్తకం – 6

  1. Annapurna says:

    Super Muraligaru.

  2. Sujatha says:

    సినిమా ఔత్సాహికుల అప్డేట్స్ కూడా రాయరూ?

    అలాగే ఎక్కడో ఎవరి సాహిత్యంలోంచి కొట్టుకొచ్చినవో కొటేషన్లూ, లేక జీవితాన్ని మధించి చూసినట్టు రాసే కొటేషన్లూ, సల్మాన్ ఖాన్ కండలు చూపిస్తే అమలాపురంలో అమ్మాయిలు ఇష్టపడతారా లేదా వంటి ప్రజాబిప్రాయ సేకరణలు…వీటన్నిటి గురించీ రాయండి ప్లీజ్ ప్లీజ్ ప్లీజ్!

    • Murali says:

      Sure. I already covered some of those aspects. For example, the poetry written by “Vallakatlo Ramanadham”. 🙂

  3. kamudha says:

    బాగుంది

  4. Anupama says:

    కుమ్మేసారు!!! 🙂

  5. yagnasrialla says:

    ee sari perlu marchakunda .. asalu perlathone andarini utikesaru.. style marchukunnara..!!

    • Murali says:

      The focus of this post is on “Facebook”. So, only that name has been changed. Anni perlu maariste confusion raavachchu ani…

  6. sushma vedam says:

    waiting for your next mukhapusthakam post!!!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s