మదర్ తెరీమా – 1

“ఇది విన్నారా, శంకర్రావు గారు, మదర్ తెరీమాకి sainthood ఇస్తారట,” ఆనందంగా చెప్పారు, కేశవరావు గారు, ఆయన పక్కనే ఉన్న కుర్చీలో కూర్చుంటూ.

“ఓహో, దానికి మీరెందుకు అంత మురిసిపోతున్నారు?” అడిగారు శంకర్రావు గారు, తన కళ్ళ జోడు తీసి తుడుచుకుంటూ.

“అదేంటండి, దేశం కాని మన దేశానికి వచ్చి, ఇక్కడే స్థిర పడిపోయి, అభాగ్యులకు, అనాధలకు సేవ చేసిన దొడ్డ మనిషి. ఆమెకి sainthood రావడం, జంబూ ద్వీపానికి, అదే మన హిండియాకే గర్వ కారణం కద. అసలే ఈ మధ్య పేపర్‌లో ఎక్కడ చూసినా మనసు నొప్పించే వార్తలే. ఈ మధ్య కాలంలో ఇదొకటే మంచి వార్త,” కాస్త అసహనంగా బదులిచ్చారు కేశవరావు గారు.

“అసలావిడ ఏం సేవలు చేసిందో మీకు సరిగ్గా తెలుసా, సార్?” అడిగారు శంకర్రావు గారు.

“అంటే చావుకి దగ్గర ఉన్న వాళ్ళని చేరదీయడం, కుష్టు వ్యాధి ఉన్న వాళ్ళకు ఆశ్రయం కలిపించడం, ఇంకా ఎయిడ్స్ పేషెంట్స్‌కి ఒక నీడ కల్పించడం, ఇలాంటివి అన్నీ చేసింది కదండి?”

“నిజమే, ఆశ్రయం ఇచ్చింది. ఆ పైన?”

“ఆ పైన, ఇంకేం చేయాలి?” చిరాకు ధ్వనించింది కేశవరావు గారి గొంతులో.

“వారిని బాగు కూడా చేయాలి కద?”

“చేసే ఉంటుంది సార్. నాకు డిటెయిల్స్ సరిగ్గా తెలీవు అనుకోండి.”

“చేసి ఉంటే బాగుండేది, కాని అలా జరగ లేదు. ఆవిడ వారిని చేరదీసిన ముఖ్య కారణం, వాళ్ళు గౌరవ ప్రదంగా చనిపోవడానికి.”

“గౌరవ ప్రదంగా చనిపోవడానికా? అదేంటి?”

“అంటే రోడ్ల మీద దిక్కు లేని చావు చావకుండా, తమను ప్రేమించే వారి మధ్య చనిపోవడం అన్న మాట.”

“ఎవరు ప్రేమిస్తారు?”

“అదే, మదర్ తెరీమా, ఇంకా ఆవిడ శిష్యురాళ్ళు.”

“ఓహో, ఇదేదో కాస్త కన్‌ఫ్యూజింగ్‌గా ఉందనుకోండి. కానీ ఒక రకంగా ఇది కూడా మంచి పనే కద! ఎలాగూ చావు తప్పని వాళ్ళకి అలాంటి మంచి చావు కల్పించడం.”

“అందులో కొందరు మాత్రమే అలాంటి వారు. చాలా మంది బతికే అవకాశం ఉన్న వారే. వారిని కూడా బ్రతికించ లేదు.”

“అంటే, దానికి బోలెడు డబ్బులు కావాలి కదండి!”

“మదర్ తెరీమాకి డబ్బుల కొదవ లేదు. మీలాంటి చాల మంది, ఆవిడ స్వయాన దేవుని అవతారం అని నమ్మి, బోలెడు విరాళాలు ఇచ్చారు. కానీ అవీ చేరాల్సిన వారికి చేరలేదు. అసలు మదర్ వాటిలోంచి ఒక పైసా కూడా తీసేది కాదు. ఆవిడ దగ్గర ఎన్నో సంవత్సరాలు పని చేసి, ఆవిడతో ఎంతో సన్నిహితంగా మెలిగిన Susan Shields చెప్పడం బట్టి, విరాళాలు తీసుకోవడం వరకే మదర్ సంస్థలో పని చేసిన వారి బాధ్యత. ఆ తరువాత ఆ డబ్బు ఎక్కడికి వెళ్ళిందో ఎవరికి తెలీదు.” (Former Catholic Nun says Mother Teresa is a fraud!)